Mshika Mawili Moja Humponyoka

Walikuwepo ndugu wawili wanaume, mmoja jina lake Shauri na mmoja Taabu. Ndugu hawa walipelekwa shuleni tokea walipokuwa wadogo, Taabu alikuwa na umri wa miaka saba na Shauri alikuwa na umri wa miaka minane. Watoto hao walikuwa mahodari sana huko shuleni, walikuwa na jitihada kubwa sana ya kusoma. Wakirudi huko shuleni wakichukuwa madaftari yao na penseli zao na wakifika nyumbani walikuwa hawashughulikii jambo lolote ila kusoma na kuandika. Jinsi walivyokuwa wakitumia wakati wao wote katika kusoma na kuandika mama yao aliona kuwa watoto wake wataumia kwani hawaoni katika kucheza hata mara moja. Basi alikuwa akiwaambia, 'Kwa nini hampumziki ninyi?' Wakamjibu, 'Tukipumzika wenzetu huko shuleni watatupita nasi hatutaki kupitwa kwa hivyo tuache tu, mama.' Mama yao alipowaona watoto wake wanasema maneno ya halali yaani ya kweli, alijinyamazia. Watoto hao walikazana sana, na aghalabu, Shauri akitokea wa kwanza katika mtihani na Taabu wa pili au kinyume cha hivyo, haikupata kutokea wa tatu hata mmoja katika wao. Watoto hao walisoma mpaka wakafika darasa la kumi na mbili. Hapo walifanya mtihani unaoitwa Cambridge. Kwa bahati mbaya Shauri hakupasi lakini Taabu alivuka yaani alifuzu. Serikali ilimsaidia Taabu kwa kumpeleka Ulaya Uingereza kwa ajili ya masomo ya juu. Shauri alisoma tena darasa la kumi na mbili. Taabu alipofika Ulaya mambo yote yalimbadilikia. Aliona mambo yote ya huko yametofautiana na yale ya kwao. Jambo lililompendeza kuliko yote ni mchezo wa dansi. Taabu alichukuliwa na wanafunzi wenzake kwenda kutazama dansi, ua alipofika huko alikaribishwa vizuri. Kwanza waliletewa viburudishaji na huku mdundo unaendelea. Dansi ilikuwa ikichezwa baina ya wanawake na wanaume. Waliokuwa wakicheza walipendeza sana kwani aliyekuwa mkubwa zaidi alikuwa na umri wa miaka kumi na nane na mdogo wao alikuwa na umri wa miaka kumi na nne. Taabu tu ndiye aliyekuwa katika umri wa miaka ishirini. Mmoja katika wale rafiki zake Taabu, alimleta mtoto mmoja wa kike aliyekuwa mzuri sana na akamjulisha na Taabu kisha, yule mwanamke, akamuomba Taabu wacheze pamoja. Taabu alifurahi kupita mpaka, kwani alikuwa akijuajua kucheza, kabla ya kwenda Ulaya, lakini hakupata kucheza na mtoto wa Kizungu. Basi Taabu alijikunjua vyema kwenye dansi. Dansi ilipovunjika Taabu alirudi nyumbani pamoja na rafiki zake. Usiku ule Taabu hakupata usingizi kwa kufikiri utamu wa dansi. Asubuhi Taabu alikwenda shuleni hali fikira yake yote iko kwenye dansi ya jana. Mwalimu alipokuwa akisomesha, mengine alikuwa akiyasikia na mengine yalikuwa yakimpita. Kama tulivyoona kuwa Taabu alipendezewa na dansi kuliko yote aliyoyaona huko Ulaya. Siku zote akiwauliza rafiki zake wamwambie pahali penye dansi. Taabu alipoteza wakati wake wote kwenye madansi. Taabu aliazimia asome namna ya kucheza dansi yaani ajue namna zote za michezo. Taabu hakushughulika na masomo yake kabisa ila dansi tu. Kwa hivyo kila mara alikuwa anafeli yaani hapasi katika mtihani. Ndugu yake Shauri alifuzu katika mtihani wake wa Cambridge mwaka wa pili na Serikali ilimsaidia kumpeleka Amerika kusoma udaktari. Huko Amerika Shauri aliona mambo mengi ya kumfurahisha kuliko yale aliyoyaona Taabu huko Ulaya Uingereza. Katika mambo aliyoyaona Shauri ni mambo mawili tu yaliyomfurahisha kuliko yote nayo ni dansi na mashindano ya farasi. Walimu wa yule Taabu aliyekuwepo Ulaya Uingereza walipeleka habari ya Taabu huko kwenye Serikali yao kuwa Taabu haendelei katika masomo yake. Kwa hivyo Serikali ilimpelekea barua kuwa arudi. Masikini Taabu alirudi pasi na kupata shahada yoyote ya masomo isipokuwa uhodari wa kucheza dansi. Serikali yake ilimlaumu na watu pia huko kwao walimsikitikia. Huko kwao Taabu alipewa kazi ya ukarani wa kupokea kodi za viwanja vya serikali. Taabu hakuipenda kazi hiyo lakini hakupewa nyingine kwani hakuwa na elimu ya kutosha ya kumwezesha kufanya kazi bora. Mshahara wake ulikuwa hautoshi lakini akiishi hivyo hivyo. Shauri, kama tulivyoona kuwa alipenda sana dansi na mashindano ya farasi huko Amerika lakini juu ya hivyo alishughulikia masomo yake zaidi. Mara moja Shauri alikwenda kwenye dansi na alikaa huko mpaka saa nane za usiku ndipo aliporudi kwenda kwake kulala. Alipoamka alikuwa na usingizi mwingi na siku ile hakuweza kufanya kazi vizuri huko shuleni. Walimu wake walimlaumu na kumshitakia sana kwa kazi zake mbaya za siku ile. Kwa hivyo tokea siku ile alianza kuichukia dansi na michezo yote hasa ile ya usiku. Alikuwa na azima ya kujifundisha kupanda farasi na kujua kushindana pia, lakini alifahamu kuwa mambo hayo yatampotezea wakati wake wa kusoma. Kwa hivyo aliacha kila kitu cha mchezo na akaendelea na masomo yake tu. Shauri alitokea kuwa mtoto hodari sana na kwa bahati nzuri na kwa jitihada yake alifuzu. Alipata Shahada nzuri ya udaktari. Shauri alirudi kwao kwa furaha kubwa. Watu wote hapo kwao walimfurahia na serikali pia. Shauri alitokea kuwa daktari mashuhuri sana na maisha yake yalikuwa mazuri kabisa. Taabu aliyeshughulikia dansi huko Ulaya Uingereza hakupata kusoma ila alipata hiyo dansi isiyomsaidia kitu. Lakini Shauri, ingawa alifeli mara moja, alijitahidi na kusoma tu na alifuzu. Kwa hivyo watu husema muangaza mbili moja humpona, basi Taabu aliponwa na elimu akapata mchezo.