Mtaka Cha Uvunguni

 

Alikuwepo mtoto akisoma shule pamoja na wenziwe waliokuwa na umri mmoja, mtoto huyo akipenda kwenda shuleni na akiyapenda aliyokuwa akisomeshwa, lakini alikuwa na ila mbaya sana. Ila zake alikuwa akisinzia wakati mwalimu anaposomesha na mengi yaliyokuwa muhimu yakimpita. Ila ya pili alikuwa akifikiri nje wakati wa darasa, ama akifikiri kucheza mpira au kwenda sinema usiku au kwenda pwani kuogelea au kwenda kununua vitu vya kula akitoka nje. Akipewa kazi za nyumbani alikuwa akifanya nusu tu na nusu nyingine akifanya huko huko shuleni kwa kutazamia vitabuni au kwenye madaftari ya wanafunzi wenziwe. Akili yake haikuwa mbaya lakini ila hizi zilimsabibisha kuwa nyuma sana katika masomo yake kuliko wenziwe. Mara kwa mara mtihani ukija, yaani kutazamwa wanafunzi waliofahamu masomo yao barabara na walio bora kuliko wengine, alikuwa akipitwa sana na wenziwe na pengine akianguka, yaani akikaa pahali pate pale pasipo na kwenda madara ya juu. Mara moja alianguka katika chumba cha sita kwenda cha saba. Siku hiyo alilia sana, akaenda mpaka kwao na kilio, akaulizwa analolilia akasema kuwa amefeli, hakupasi, yaani hakwenda chumba cha juu.

Baba yake alimwambia, 'Ndio siku zote ninakunasihi uache mchezo mwingi na ujitahidi katika darasa zako husikii, basi hiyo ndiyo faida ya mchezo. Huwezi kupasi ila ujitaabishe kweli kweli,





hukusikia watu wanasema mtaka cha mvunguni sharti ainame? Basi usipoinama hukipati cha mvunguni, mwanangu, na kuinama ni kujikaza kwa kila njia. Njia zenyewe ni: Kwanza ni kumsikiliza mwalimu barabara wakati anaposomesha, pili usilolifahamu umuulize pale pale kabla hajaendelea na kusomesha jingine, tatu uache kufikiri cho chote kingine wakati wa masomo. Jambo jingine ukiondoka shuleni ufanye kazi zote nyumbani ulizopewa shule, na usizifanye ovyo ovyo, uwe na hakika kuwa unavyofanya ndivyo. Usilolifahamu tazama maelezo zaidi katika madaftari yako, na kazi utakayoikosa, kama vile hesabu na nyinginezo, lazima ufanye tena mpaka uzijue. Ukifanya hivi, mwanangu, lazima utapasi kama wenzio.' Yule mtoto aliwacha mchezo wote aliokuwa nao na akafuata maneno aliyoambiwa na baba yake. Kwa kufanya hivyo alitokea kuwa mtoto hodari kuliko wote humo katika darasa, kwa hivyo mtihani ulipokuja alitokea wa kwanza. Alipata karibu alama tisini katika alama mia kwa kila fundisho lililotolewa katika mtihani. Walimu walifurahi sana na uhodari wa mtoto huyo. Baba yake pia alifurahi kwa kuona mtoto wake alisikiliza mawaidha yake. Badala ya mtoto huyo kwenda darasa la saba (kwani alikuwa katika darasa la sita) walimu wake walimrukiza na kumpeleka darasa la nane kwa uhodari alioufanya wakati wa mtihani. Walimu wake walijua kuwa sababu ya uhodari huo, yule mtoto aligombezwa na baba yake kwa kutokupasi na kwa kufeli, basi kwa hivyo yule mtoto alijitahidi sana hata akapata aliyokuwa akiyataka. Hapo yule mtoto alijua maana ya fumbo mtaka cha mvunguni sharti ainame. Yaani alijua kuwa kuinama ni kutaabikia kila jambo unalolitaka, ukikataa kuinama, yaani kujitaabisha, utakalo hulipati.