MAMA AMKA UIPOKEE ZAWADI YAKO

 

SIMULIZI FUPI : MAMA AMKA UIPOKEE ZAWADI YAKO



Kulikuwapo na mama ambaye alikuwa na kijana mmojatu, kijana ambaye mama alitokea kumpenda sana harikadharika kijana naye kumpenda mama.



Lakini kutokana na mihangaiko ya maisha iliwapelekea wawili hawa mtu na mamaye kuishi mbalimbali. Kwakuwa mama alijitahidi sana kumsomesha kijana kwa bahati nzuri kijana alipata kazi na kwenda kuishi mjini huku mama akiwa kijijini. Hata hivyo umbali wao wala haukuwafanya wajisikie wapweke sana kwakuwa kijana alijitahidi sana kuwasiliana naye . Faraja ya mama ilimtengenezea maisha yenye furafa kijana wake kwa kiasi kikubwa akiwa mjini.



Baada ya muda Fulani kupita mama alianza kutengeneza dukuduku moyoni kwakuwa kila anapohitaji pesa za matumizi kwa mwanaye basi lazima aanze yeye kumueleza mwanaye kuwa anashida ya pesa. Utu uzima ni dawa, mama alikuwa katika misingi hiyo. Kabla ya kumueleza shida zake alikuwa anaanza kutumia utuuzima wake kwa kumuulizia hali ya maisha aliyonayo kijana wake mjini. Kila asikiapo kijana wake akilalamika kuwa mjini maisha ni ya ghari kwakuwa kila kitu kinanunuliwa hadi maji ya kupigia mswaki, mama hakuwa na nyongeza.



Kitendo kile kilimfanya mama alifute dukuduku lile, huruma ilimjaa juu ya mwanaye alitamani hata baadhi ya nyakati yeye awe anamtumia pesa mwanaye ila tu hakuwa na uwezo huo. Mahitaji ya mama hayakuwa makubwa sana pale nyumbani ila alikuwa anayakosa. Hakuweza kumueleza mwanaye shida zake kutokana na huruma aliyonayo juu ya mwanaye(wakina mama wengi ni wazito sana kueleza shida za pesa kwa wanao tofauti na wakina baba). aliamini wazi ingawa anafanya kazi ila bado anaishi kwa shida kutokana bado anajijenga kimaisha pili maisha ya mjini yanagarama sana. Aliendelea kumuombea mwanaye mafanikio.



Wakati mama akiwaza hayo juu ya kijanaye, kumbe mambo yalikuwa tofauti kidogo. Siyo kwamba kijana alikuwa hapati pesa kabisa za kumsaidia mama yake, rahashaa, bali pesa alikuwa anazipata ila hazikuwa nyingi kama alivyokuwa akihitaji. Kijana alikuwa mzito sana kumsaidia mama yake siyo kwa nia mbaya bali aliona siyo jambo zuri kumtumia mama pesa kidogo kidogo. mfano akimtumia mama yake Tsh.10,000/= ndani ya siku chache atatakiwa amtumie tena, kwake hakupendezewa na hilo.



Kijana hakuwa na mawazo mabaya na mamaye,alichokifanya ni kuanza kuwekeza pesa kwa njia mbali mbali mfano kuweka kibubu na kutenga mshahara aliokuwa akiupata, lengo ni kwenda kumuridhisha mamaye kwa mpigo (surprise).



Maisha yalisonga, kiajana anazidi kujiwekeza huku upande wa pili mama anazidi kuteseka.taarifa ilimfikia kijana kuwa mama yake anaumwa. Aliamua kufunga safari na kwenda kumuona. Ingawa alikuwa anaenda kumjulia khari lakini pia alichukua kiasi chote cha pesa alichojwekeza kwa muda mrefu na kufanya maandalizi ya nguvu kwaajili ya mamaye. Kiasi kingine cha pesa aliendanacho kwa lengo la kwenda kutatua shida ndogo ndogo.



Alipokwisha kufika matarajio yake yalikuwa tofauti sana. Badala ya kumjulia khari mamaye ambaye alikuwa akiumwa bali alifikia kuuaga mwili wa mamaye . tayari alikuwa ameshaaga Dunia. Ilimuuma sana kijana, alilia kwa uchungu huku akijilaumu kwa mengi juu mamaye ambaye walipendana sana.siyo sili kina alimpenda sana mama yake na alikuwa anatamani sana amfurahishe mama yake, hivyo moja ya njia sahihi ya kumfurahisha mama yake aliona ni ile ya kujiwekeza na kumfanyia Surprise. Kila alipokuwa akilia aliweza kuzungumza maneno machache sana “MAMA AMKA UIPOKEE ZAWADI YAKO”.



MWISHO.



********

FUNDISHO.

Vijana wengi wa sasa tunaishi maisha ya namna hiyo, maisha ya kudhani mama/mzazi anahitaji kikubwa ndipo aridhike. Tunaishi kwa mfumo wa mwisho wa mwezi ndipo nimuwezshe mzazi.



Vijana, sawa maisha ya sasa ni magumu. Lakini ukichunguza kwa kina mama aliyeko kijijini hana mahitaji makubwa kiasi kwamba wewe ukashindwa kuyamudu hadi ukajiwekeza kwa muda mrefu. Usione aibu wala usione kazi kumtumia mama yako ulichonacho. Sikuzote kidogo ukiwanacho, kwa asiye nacho ni kikubwa. Wazazi hasa wa kijini wanajitahidi sana kubana matumizi, Tsh.5000 utakuta anatumia hata wiki mbili. Sasa wewe unataka ujiwekeze hadi ifike laki sita ili atumia miaka?. Wengine utakuta anapesa kidogo ya hakiba, anawaza kumpa mama haimtoshi ila kwenye starehe anaenda kwa pesa ile.



Mfanye mama yako ni sehemu ya furaha yako,kama huna basi muombe sana Mungu upate, ila kama unacho usiseme hicho ni kidogo mama atakidharau. Mpe ulichonacho kisha jitume na kumuomba sana Mungu ili kesho upate kikubwa zaidi ya hicho na utamfanyia hiyo Surprise unayopanga kumfanyia mama yako.



Nimemtumia sana mama kwakuwa ndiye mhangaikaji mkubwa ndani ya nyumba. Binafsi nimepitia maisha ya U- bachelor , nakiri kuwa hamna kazi ngumu katika kuhakikisha unakula na kushiba kama kutafuta mboga. Hivyo kidogo unachokiona wewe, mama kwake kitatatua lile tatizo gumu la kupata mboga hakika atakuwa na furaha sana.



Ninaimani vijana wenye tabia hii ya kuwasahau wazazi wetu na kusubiri tupate pesa nyingi ndipo tuwakumbuke tupo, tukiendelea nayo tabia hii tutakuja kuwakumbuka Maiti. Siyo kwamba hatuwapendi wazazi wetu, tunawapenda sana ila kumfanya mama awe anatabia ya kukuomba kila mara kwako, wala siyo nzuri kwani huyo hajawa ombaomba. Alikusomesha au alikuwezesha sasa unajitambua unatakiwa utambue na wajibu wako kwake.TUBADILIKE



MWISHO

Read More

MWANZO MWEMA SIO MWISHO MWEMA

 

 MWANZO MWEMA SIO MWISHO MWEMA



Magoma bi bi bi! ndiyo yalinigutusha kutoka usingizini. Mara nilisikia ile sauti nyororo kama kinanda ya ngoi ikiongoza wimbo, ambao kwa kawaida uliimbwa katika sherehe za arusi. Niligutuka kwa haraka, kuitupilia blanketi yangu mbali na kujisongeza dirishani na kupenyeza pazia. Kumbe kulikuwa kumekucha kwa kiasi hicho!

Shamshi lenye uhai lilikuwa lishachomoza, ishara kuwa ilikuwa mwanzo wa siku njema kwani siku njema huonekana asubuhi. Ingekuwa siku ya kukata na shoka kwani sahibu wangu Yohana angeuasi ukapera kwa kufunga akidi za maisha na kidosho Rebeka, waliyekutana na kupendana tangu tulipokuwa chuoni. Niliharakisha kujitayarisha ili nielekee kule kwani chelewachelewa utamkuta mwana si wako.

Takribani mwendo wa saa nne na nusu, mambo yalikuwa yametengenea. Kanisa lilikuwa limepambwa likapambika. Maputo ya kila aina na kila rangi yaliangikwa na kutundishwa ukutani. Tungu za mle kanisani zilimwayamwaya mwangaza na kufanya mle ndani kuwa mchana zaidi.Pengine kanisa lingekuwa likipambwa vile kila Jumapili, lingewavutia na kuwanata waumini chungu nzima. Mimbarini, mandishi makubwa ya rangi tofauti yalionekana na kusomeka eti: ‘REBEKA AOLEWA NA JOHANA ’





Mara ghafla Yohana na kundi lake liliwasili. Waume na vijana waliovalia nadhifu walimfuata unyounyo. Yohana alionekana mtanashati ajabu. Nilimhusudu. Ungelimwona msomaji wangu siku hiyo, usingelijua kuwa ndiye kijana aliyekuwa akipata adhabu siku zote shuleni kwa kuvalia sare zilizochakaa na kujaa makunyanzi kana kwamba zimetafunwa na ng’ombe na kisha kutemwa. Nywele zake daima zilisokotana kama vidude vya vinyesi vya mbuzi. Lakini kumbe maisha humbadili mtu. Pengine ni mapenzi ndiyo humafanya mja kubadilika.

Sasa Yohana alivalia suti nyeusi ti! na tai ndefu juu ya shati lake jeupe. Ndevu zake alizoziacha zilimwongezea haiba iliyofanya wengi kumtamani. Akapokelewa kwa shangwe kuu na kuingizwa kanisani.

Muda mfupi baadaye liliwasili kundi la bi arusi, Rebeka Mapesa na wafuasi wake.

Waliwashangaza mno waumini kwa namna walivyong’aa. Rebeka  mwenyewe alivalia nguo ndefu iliyomfunika hadi miguuni na kumpwayapwaya. Uso wake usingeuona kwani alikuwa kafunikwa kotekote. Sijui alionaje alikokuwa akikanyaga kwa kuwa mwendo wake ulikuwa wa mzofafa tena wa polepole kama kobe. Alikaribishwa na nyimbo za kuongoaongoa na kufuatilia zulia nyekundu waliyotandikiwa kuingia kanisani.

Kanisa lilijaa watu kutoka tabaka mbalimbali. Si wageni walioalikwa, si wazazi na watu wa jamii zote mbili na pia baadhi ya tuliosoma nao. Nyimbo ziliimbwa na masomo kutoka katika kitabu takatifu yakasomwa. Ikafika kilele. Wakati wa kuwaunganisha wawili hao. Kasisi aliyevalia mavazi meupe pe na nadhifu kana kwamba kukubaliana na ndoa yao alisonga mbele tayari kutenda kazi yake muhimu ya siku. Wawili wale wakawa wamesimama mbele yake. Kutoka nilikoketi, Rebeka alionekana malaika wa Mungu.

Wengi tulimmezea mate ndanindani lakini macho yake Yohana yalionekana kutuonya kuwa bahati ya mwenzio usiulalie mlango wazi. Aidha, nilikumbuka amri ya Mungu iliyoonya dhidi ya kutamani mali ya mtu mwingine.





“Kabla ya wawili hawa kuunganishwa na kufanywa kuwa kimoja, kuna yeyote aliye na pingamizi?” kimya kikuu kikaibia. Hakuna aliyejitokeza na swali likarudiwa mara mbili na kasisi. Kisha mwanaume mmoja aliyevalia nadhifu akanyanyuka kutoka kule alikoketi! Waumini nyoyo ziliwabapabapa na kuwaenda benibeni. Kila aliyeketi akawa ameachama, mdomo wazi kama pango la nyoka na kumtupia tazamo refu kama la mjusi. Mimi nilimjua kama Bohaz, kakake Yohana aliyesomea Ujerumani, akaishi na kufanya kazi huko. Alitaka tu kuhahikisha kuwa hakuna yeyote aliyepinga arusi ya nduguye. Ndio maana Yohana na mchumba wake hawakustushwa kamwe aliposimama. Lakini waumini hawakumjua ndio maana walishakata kauli mapema. Kumbe usilolijua ni kama usiku wa giza.

Ni wakati huo ndipo ilimjia msimamizi akilini kuwa pete zao zilisahaulika kule walikokuwa wakivalia na kufanyia mapambo ya Bi. Arusi. Alimnong’onezea kasisi mawili matatu na kuondoka kasi kama umeme. Kwa umbali kidogo, Yohana alionekana kukereketwa na kusinywa naye. Akatamani kumparamia na kumzabazaba makofi. Lakini alisimama patakatifu. Tena hakutaka kuonyesha hasira zake kwa umati. Pengine alikumbuka kuwa hasira hasara.

Wanakwaya wakaendelea kuwatumbuiza waumini na nyimbo za kikristo kwa furaha hata wakasahau kilichotokea. Wakadhihirisha bayana kuwa kuvunjika kwa mwiko sio mwisho wa mapishi. Waliendeleza nyimbo hadi msimamizi aliporejea muda si mrefu. Shughuli za awali zikaendelezwa. Maarusi wakakiri maneno baada ya kasisi na wakaanza kuvishana pete, huku kanisa zima limeja shangwe, vigelegele, hoihoi na nderemo pamoja na makofi ya furaha.







Kelele na furaha zilikatizwa ghafla na unyende kutoka nje. Mwanamke aliyeonekana chakaramu alikuwa akitimua mbio akielekea mimbarini. Alivaa nguo zilizoraruka na isitoshe alikuwa miguu mitupu.Maneno yalimtoka kwa sauti na haraka yasisikike vizuri. Vijitoto viwili vichafu vilimfuata pia mbiombio. Vilikuwa uchi na vilivyoparara ajabu! Mama yao alitamka kwa sauti kuwa Yohana alikuwa mumewe, baba ya vile vijototo. Eti walipendana na kuzaa vitoto hivyo kitambo kidogo Yohana alipokuwa angali chuoni! Kumbe ukistaajabu ya musa utayaona ya firauni.

Umati wa waumini uliduwaa na kuzuzuwaa. Kasisi bibilia ilimtoka mkononi na tang! Kuanguka sakafuni. Tayari vitoto vilianza kumpandiapandia Yohana na kumwitaita ‘baba.’ Yohana mwenyewe alipigwa na butwaa na akawa na mshtuko mkubwa. Parafujo za mwili wake ziliregea regerege na kukataa kumsimamisha imara. Rebeka alikuwa akifunzwa adabu na yule mwanamke chakaramu kwa kumwibia mume. Waumini wakajazana jukwani angalau kumwokoa. Nguo zake zilizokuwa nyeupe zilipata rangi mpya ya uwekundu. Mambo yalimwendea segemnenge na mvange, maji yakazidi unga na akazimia jukwani. Akawa amelala asijijue asijitambue. Jukwaa takatifu la Mungu likabadilishwa kuwa jukwaa la miereka na ndondi ya watu kupimana nguvu..



Naam, kilichoanza kwa mbwembwe na hanjam, sasa kilikuwa kikimalizika kwa fujo, rabsha, ghasia na vurumahi. Muumini mmoja alinivuta mabegani kwa nguvu akitaka kupita kuenda mbele kujionea sinema ya bure pia. Nikahisi uchungu wa ajabu na hapo ndipo niligituka na kupata kuwa misa ilikuwa imekwisha. Wanakwaya walikuwa wakiimba nyimbo za mwisho huku waumini wakiondoka na hapo ndipo mmoja alinigusa mbegani kuniamsha! Nilijinyanyua halahala kwa aibu hata sikutaka kuwatazama waumini walioonekana kunicheka. Kumbe nilikuwa nimelala muda huo wote kanisani mahubiri yalipokuwa yakiendelea na kupotelea katika ndoto hiyo! Niliapa kutoketi nyuma tena kila niingiapo kanisani kwa kuhofia kulala tena nyumbani mwa Bwana

Read More

SIKU NAJA DUNIANI

 

SIMULIZI FUPI - SIKU NAJA DUNIANI



NIKIKUMBUKA NAZIDI KUMPENDA



Zilikuwa zimepita wiki mbili tangu mwanamke mmoja arudishwe kutoka hospitalini ambako licha ya vipimo na dawa mbalimbali za kunywa,sindano na hata za kuchua hakupata afuheni ya ugonjwa alikuwa nao.Wanawe pamoja na mumewe waliamua kumpeleka katika kitongoji cha KILIMUSI eneo ambalo yeye na mumewe waliamua kupafanya nyumbani kwao licha ya nyumba walizokuwa nazo katika vijiji vingine



Wakati mwanamke huyo ambaye tabia ya kumwita kila aliyemwona MWANANGU bila ya kujali umri wake ilimfanya hata wajukuu zake na hata wakubwa wenzake kumwita mama akigalagala kwenye godoro kuukuu pale sebuleni, nje yake kulikuwepo na mwanamke mwingine ambaye naye alihangaika juu ya kipande cha mkeka akiota jua la asubuhi.Sauti yake ya upole uliochanganyika na uoga iliuliza swali moja kwa kila aliyemhisi kuwa alitokea pale sebuleni."kaka mama anaendeleaje?"aliuliza yule mwanamke wa pale nje ambaye haikuhitajika elimu ya uuguzi kujua kama alikuwa mjamzito labda kwa sisi wa enzi hizooo ambao bado tunaamini watoto hununuliwa."Hivi hivi tuombe tuu Mungu"Alijibu yule baba akionekana kukata kabisa tamaa. "Mhhh,,"aliguna yule mwanamke akimtazama usoni kaka yake mwingine ambaye alikuwa ametoka tu kufika kumwangalia mama yake lakini hali aliyokutana nayo ndani kama si kujilazimisha kujikaza kiume angeweza kulia kwa sauti. Kiukweli hali ya mgonjwa aliyekuwa akijaribu kupambana na mauti ilimkatisha tamaa kila aliyemwona.Hakuna hata mmoja kati ya wengi waliokuwa pale kuwaza kitu kimoja tuu MSIBA wa mama ,mama ambaye watoto wake wengi na wajukuu walikuwa wakimkimbiamara tu muda wa kusali rozali ukifika kutokana na tabia yake ya kumlaazimishakuu walikuwa wakimkimbiamara tu muda wa kusali rozali ukifika kutokana na tabia yake ya kumlazimisha kila aliyekuwa jirani yake kujumuika naye kusali.Sala ndicho kitu alichokipenda huenda kupita vitu vingine japo uvivu na utoto wa wanae ndivyo vilivyowafanya wamkimbie na kumwona kama msumbufu. ''Jamani mama ameongea! Anamwita dada Kalista"ilikuwa ni sauti ambayo kwa kila aliyeisikia hakuhitaji utambulisho wa mhusika wake,Mtoto wa mwisho wa yule mama ambaye wakati wote alikuwa pembeni ya mama yake akimtaka apone huku kilio chake kikiwafanya wengi waliomwona akihangaika kumlazimisha mama yake aongee washindwe kuvumilia na waishie kutoka nje huku macho yao yakishindwa kuficha kilichokuwa moyoni mwao.



 "Wanini na we Thelesia, dada yako si anaumwa halafu unampigia kelele?"Aliongea Lusida mtoto wa kwanza wa yule mama ambaye alisutwa na sauti ya mama yake ikimwita Kalista na kuwafanya wote walioisikia wakimbilie pale sebuleni wakimwangalia yule mama ambaye yeyote ambaye angefika muda ule asingeamini kama mgonjwa yule ndiye aluyesikia habari zake kuwa alisubiri tu Israel mtoa roho ampitie. "Si nimemwita kalista nyie mnafuata nini?"aliongea yule mama akimalizis na kicheko na kumfanya mumewe awaamuru wengine kutoka kwa ishara. "Na wewe mbona unaelekeza tuu wenzako?, basi we mume wangu ubaki" sauti yenye tumaini ilisikika kutoka kinywani mwa yule mama na kuwafanya wengine kucheka huku wakitoka pale nje. "Niambie na mimi nitoke pengine mna siri zenu"aliongea mumewe skitishia kutoka lakini aliishia mlangoni ambapo alifunga mlango na kuketi kwenye kigoda kilichokuwa pembeni. "Sawa mwanangu haa mume wangu"yule mama aliongea na kuziba mdomo kwa kiganja chake na kuwafanya waliokuwepo kucheka. "Sawa mama nimekuelewa"alijibu yule baba na kupafanya pahala pale palipokuwa na huzuni muda mchache uliopita pawe pa furaha. "Enhee mwezi wa ngapi mama?"aliuliza akimgeukia Kalista ambaye mwonekano wake ulionesha wazi alikuwa akiumia.



 "Wa mwisho''alijibu kwa unyonge akikaa vyema. "Huyo sasa ni wa kiume na utampa ng'ombe wangu mmoja, najua huamini hadi umuone maana nasikia mumeo amechachamaa anataka vidume kwani kama mahari za wale wawili zinatosha"baada kuongea maneno yale alianza kubadika na kupoteza nguvu zake alizokuwa nazo muda mchache uliopita. "Mwanangu usiogope mtu akaribiaye kufa hupona kuaga, naona malaika wale wanakuja ,zingatia sal sa, ,sala mwanao wa kiume"Aliongea na kutulia kimya wakati huo Kalista naye alikuwa akilalamika maumivu makali hadi walipimtoa pale sebuleni kwa kumbeba na kumuingiza kwenye chumba kilichokuwa karibu. Wakati mauti yakimshinda yule mama pale sebuleni mkunga wa jadi ambaye naye alikuwa mfiwa alikuwa akisaidia kuokoa maisha ya kiumbe ambacho leo hii kinatimiza miaka ishirini na mbili.******★****** MWISHO**--

Read More

MDUDU ALINIUMA

 

 MDUDU ALINIUMA



Mbinguni, jua lilikuwa limemaliza kazi yake na sasa lilijikokota magharibi huku mionzi yake miekundu ikiwapungia walimwengu kwa ulegevu kana kwamba kuwashukuru wale wote walioipenda. Masikini nilibaki pale uani nimelitumbulia macho, huku machozi yakijikusanya tayari kumwagika. Heri ningekuwa jua. Nisingekuwa na wasiwasi wa swala lolote. Langu lingekuwa tu kuchomoza asubuhi na kutua jioni.



Nilikuwa nimechoka kuwatazama wapita njia na magari ya kifahari. Yalikuwa mapya na yalikwenda kwa kasi tena bila kutoa sauti. Lakini kuna yale yaliyochakaa yenye breki zilizokwaruzana kila yaliposimama. Watu nao walipita wa aina tofautitofauti; si weusi, si weupe, warefu kwa wafupi na hata vijana kwa wazee. Kwa umbali,taa za umeme zilikuwa zimelimwaia jiji mchana bandia wa mwangaza. Ishara kuwa usiku ulikuwa unaingia na giza kuanza kutawazwa.

Yote hayo sikuyaonea fahari tena. Mambo yalikuwa kangaja kumbe na sasa yalikuja. Niliketi nikiwazia matokeo ya daktari, ambayo niliyapokea takribani miezi miwili iliyopita. Awali, walinificha ukweli lakini niliposisitiza, nilipasuliwa mbarika. Laiti wasingelinijuza kwani tangu hapo maisha yangu yalichukua mkondo tofauti mno. Mwenyewe, ile hamu na tama ya kula vyakula iliniondokea. Nikawa sili lolote, sinywi chochote. Mashavu yangu yalizidi kushobwekea ajabu. Nguo zangu ningezivua, mbavu zingehesabika hadharani moja baada ya nyingine. Nyele zangu zilizokuwa ndefu na nyeusi ti sasa zilibadili rangi na kuanza kuchipuka ovyoovyo. Mdudu alikuwa ameniuma. Lakini yupi?





Darubini yangu ilinikumbusha mambo yalivyoanza. Yote yaling’oa nanga baada ya kumaliza kidato cha nne. ‘Mrembo’ nilijidai kwenda jijini kutafuta kazi ya ukarani. Niliwahakikishia wazazi kuwa nilikuwa na rafiki wengi waliojitolea kunipa makao wakati nikitafuta kazi. Wavyele wakadinda kuniruhusu mwanzoni lakini baada ya kuzidi kusisitiza na kufanya kiburi nyumbani, waliafikiana na kuniacha kwenda zangu. Pengine walikumbuka kuwa mtoto akililia wembe mpe. Nilipokuwa nikiondoka, mama alikuwa na huzuni mno na kwa uchungu, alinionya kuwa mwenda tezi na omo marejeo ni ngamani. Potelea pote. Sikutaka kusikia ya yeyote kwani nilijitia hamnazo nisikie la mwadhini wala la mteka maji msikitini. Nikawa binti kiziwi asiyesikia anayoambiwa.

Kazi baada ya kuikosa,nilijiunga na wenzangu na tukajiajiri wenyewe. Malipo yakawa ya kuvutia ajabu kwani wateja walivyoongezeka ndivyo malipo yalivyoongezeka. Alimradi ujue namna ya kuwaongelesha na kuwahudumia wateja sawasawa. Jambo ambalo nilijifunza kufanya hata nikabobea na kutopea katika nyanja hiyo. Waume niliwabadili kama nilivyobadili mavazi yangu kwa siku. Nikawa ndiye jogoo la shamba lililowika jijini. Nikazika katika kaburi la sahau kuwa jijini kuna papa na papaupanga, ambao ukiwapapia, hukosi kupapatika kwa majuto, dhiki na mateso kama hayo yaliyonikumba sasa. Lau kumbe mwiba wa kujidunga hauna kilio.





Kutoka hapo uani nilikoketi, taa za umeme nilizoziona zilinikumbusha mengi. Kuhusu mienendo yangu ya awali nilipokuwa kipusa ajabu. Niliingia kwa vilabu hivyo vyote vya usiku huku mikono ya watu tofauti yamezinga kiuno changu chembamba kama cha nyigu. Daima kucha zangu zilizokuwa ndefu na zilinaksishwa rangi sawia na nguo zilizovalika.  Mdomo wangu ukakolezwa rangi nyekundu kana kwamba nililamba damu mbichi. Lakini kumbe dunia mti makavu kiumbe usiuegemee.

Watu hao niliowatazama waliniongezea uchungu mtupu. Moyo wangu mchanga ulijaa uchukivu na furaha ikawa imeyeyuka kama kipande barafu katika utupu wa mchanga wa jangwa la Sahara. Wale wasichana warembo waliovalia mavazi yaliyoacha sehemu za miiliyao kuonekana waliniudhi zaidi. Laiti wangelijua kuwa dunia itawararua na kuwaacha uchiuchi, wasingefika hata barabarani. Nilitamani kuwafikia niwaonye na kuwapa ukweli wa mambo kuhusu madhara ambayo yangewasibu lakini nilishindwa. Mimi pia nilikuwa hivyo na sasa nilikuwa naangamia. Nikakumbuka kuwa asiyefunzwa na mamake hufunzwa na ulimwengu.

Waume nao niliwatazama kama wanyama mwitu waliovalia suruali ndefu na sharti tofauti. Wanyama wenye uwezo mkali wa kukuvamia wakakumaliza kabisa. Wao ndio walionipa maji machafu yaliyokuwa na mdudu ambaye aliniuma na kunifanya kuugua sasa. Niliwatazama kwa uchukivu mwingi.





Raha nyingi ya ulimwengu ulitoweka na badala yake ikawa sasa ni huzuni tupu na majuto. Sasa niliishi kwa jumba hilo kubwa peke yangu. Ulimwengu ulinitenga kana kwamba mwenye ukoma. Wale wote waliokuwa wakiingia na kutoka siku nzima hata usingewaona. Dada yangu mdogo ndiye alijitolea kuniuguza pale kwani sikutaka kuishi na wazazi na kuwapa mzigo wa kunitunza. Ikanijia kuwa mla nawe hafi nawe ila mzaliwa nawe. Sikujua wa kumlaumu. Wazazi? La wao walinitakia mema na kunionya kusoma kwa bidii. Marafiki? Kwa kiasi kidogo lakini ndimi niliyekubali kudanganywa. Ulimwengu? Ndiyo lakini sehemu gani ya ulimwengu? Mimi ndiye wakulaumu na sasa mwiba wa kujidunga hauna kilio.





Ndoto zangu zote zilitoeka kama ukungu na umande. Azimio langu la kutaka kuendeleza masomo katika chuo kikuu katika fani ya sheria, na kufuzu katika uzamifu na uzamili lilitoweka ghafla kama mwangaza wa mshumaa uliozimwa na upepo. Nilitoka uani na kuingia katika chumba changu cha kulala. Mezani, kulikuwa picha yangu ya awali.nilijiangalia tena na kujiona tofauti; mnene, mwenye sura ya maji ya kunde tena mcheshi ajabu. Lakini sasa nilikuwa kama shetani hata ingawa sijawahi kuonana naye ana kwa ana. Haina maana kuishi katika hali hiyo! Niliifikia kalamu na kuandika kitu kwa karatasi iliyokuwa hapo kando. Kasha nikavuta kijichupa kilichokuwa hapo juu na kupiga makopo kadhaa ya yaliyokuwemo. Maini ya kaanza kukeketeka na koo kuungua ndanindani. Heri nife niiondokee dunia. Safari yangu ya kuenda jongomeoni ikawa imeanza nilikolala sakafuni.

Niligutuka usingizini nikihema na kutweta kwa nguvu mno hata nikashindwa kuendelea kulala. Ilikuwa ndoto ya ajabu.



MWISHO

Read More

UTENGANO

 

 UTENGANO



“Mimi sitakubali hilo lifanyike hata kidogo humu nyumbani. Heri nimwondokee kuliko kuwa na mke mwenza.” Nilisikia sauti ya mama ikija juu. Baba naye aliguruma kwa sauti akimwarifu mama kuwa ni wajibu wake kumrithi huyo mjane na kuwa hakuna kitakachomzuia. Majibizano hayo makali baina yao yalinifanya kuingiwa na wasiwasi. Nilikuwa sebuleni nikifanya marudio ya mwishomwisho kwa matayarisho ya mtihani wa kitaifa. Runinga nayo ilionyesha pasi na wa kuitazama.

Nikasikia tena sauti ya mama ikija juu, mara hii akitaka kupewa talaka na baba. Sauti yenyewe ilinifanya kunyanyuka halahala kutoka nilikoketi. Nikapitia mlango wa kati na kuelekea ndani kulikokuwa chumba chao cha kulala. Nikaegeza sikio langu mlangoni ili kusikia vyema yaliyokuwa yakisemwa. Nilijua vizuri kuwa huo ulikuwautovu wa nidhamu lakini nililazimika kufanya hivyo kwani pasipobudi hubidi.





Sauti ya baba ilisikika ikimwonya mama kuufyata mdomo wake au aongezwe nyingine. Nikawa bado nawazia lile baba alidhamiria kumwongeza mama niliposikia mlipuko wa ghafla, uliofuatiwa na usiahi mkali wa mama. Kishindo kikubwa kikasikika sakafuni pu! Sasa nilikuwa nimepata fununu kuhusu yaliyokuwa yakiendelea baina yao wawili tangu Muge, nduguye baba kuipa dunia mkono wa buriani mwezi mmoja uliopita.

Nilisikia kwato za baba zikiukaribia mlango na harakaharaka nikarejea sebuleni na kuketi kwenye zulia sakafuni, mara hii karibu na runinga. Sio kwamba nilitazama  filamu iliyokuwa ikiendelea bali nilikuwa nikiwazia yaliyokuwa yanatusibu usiku huo. Vita vilikuwa baina ya baba na mama lakini kama motto wao wa pekee, niliathirika pakubwa. Kweli mtego wa panya huingia waliomo na wasiokuwemo.

Kwa nguvu, nilisikia miguu ikitembea kwenye ushoroba na kukaribia sebuleni. Mlango ukafunguka ghafla na baba akaingia nilikokuwa. Kwa mitazamo ya kuibia, niligundua kuwa macho yake yalikuwa mekundu ajabu. Uso wake ulifinga na tabasamu huioni tena.nilimtazama kwa uchukivu mwingi. Nilinyamaa kama maji kwa mtungi kwani nami ningepata kichapo cha mbwa usiku huo kwani ukiona cha mwenzako chanyolewa chako tia maji.

Nilisimama kwa utaratibu na kuelekea mle chumbani alimokuwa mama. Nilikuwa nimeukaribia mlango tayari kuufungua sauti ya baba iliponguruma kunionya utoingia mle.mnyonge hana hiari. Nilitii maagizo shingo upande. Nikatamani kumjibu lakini nikameza mrututu kwani samba akinguruma mcheza ni nani? Kwa muda mrefu kimya kilijiri na kutawala baina yetu, isipokuwa mtima wangu uliosikika ukipabapaba kwa nguvu kama mtambo wa jenereta. Kimya kingi kina mshindo. Baba aliyakodoa macho yake kwenye runinga na kujitia hamnazoasjue kilichokuwa kikiendelea. nilitamani kubonyeza kitufe kilichokuwa mbele yangu ili kuizima lakini nikabaini yale ambayo yangenisibu usiku huo.





Mlango ukafunguka na mama akaingia sebuleni. Nikatambua kuwa shavu lake lilikuwa limevimba ana macho kufura kama ishara ya dhiki aliyopata hata ingawa alijifanya mcheshi.nilimfuata kuelekea jikoni. Ghafla baba akaingia mle akitaka chakula cha jioni.

“Kamwendee huyo Amira aje akupe…” hata kabla kukamilisha sentensi yake, baba alimfikia na kuanza kumzaba makofi. Mara hii, mama hakulimatia. Vita vikawa vimeanza tena, mara hii wapiganaji wakielekea sebuleni. Mama alipata msukumo uliomfanya kunifikia na hata sahani niliyobeba ilinitoka mkononi na tang! Kuanguka sakafuni ikapasuka vijipande. Nilijiingiza kati yao na kujaribu kuwatenganisha huku machozi yakinidondoka pia. Uchungu wa mwana kuwaona wavyele wake wakivurugana ukaniingia na kunidhurubu kwelikweli. Kwa kiasi kidogo, kuwepo kwangu kati yao iliwazuia kupigana. Baba alikuwa ameumwa shavuni na miwani yake kupasuliwa. Akawa anazungumzia kumdunga mama kisu afe. Akamsukuma mama kwa nguvu na kumfanya kuanguka kwa kishindo akanjigonga ukutani na mapua kuanza kuvujaa. Baba naye akajibwaga kochini akihema na kutweta kama aliyetoka mbioni.

Machozi yalizidi kunitiririka na nikatamanikuwaita majirani lakini mlango ulikuwa umefunwa ndi! Na baba. Nilitazama saa ukutani. Akrabu ziliashiria saa nne unusu. Kumbemavutano hayo yalikuwa yameendelea kwa masaa mawili mtawalia. Kando yake niliona picha ya wazazi wakifunga akidi za maisha. Picha yenyewe ilimwashiria baba akimvisha mama pete. Mama naye alijaa tabasamu usoni na kuonekana mrembo kupindukia. Kasisi pia alionekana akishuhudia na waumini wakishangilia. Kumbe kweli mambo ni kangaja.

Kilichounganishwa na Mungu kanisani mbele ya hadhira, sasa kilikuwa kikitenganishwa kisiri na vita vya wenyewe kwa wenyewe. Sababu ya swala nyeti la urithi wa mke, jambo ambalo nililiona kama tamaduni iliyopitwa na wakati. Nilijilaza sakafuni angalau kusali iwapo sala ingesaidia kuokoa jahazi lililokuwa likizama. Daktari mzima kama mama ambaye huwatibu wagonjwa sasa alikuwa akigaaga sakafuni kwa maumivu pasi na wa mbinu zozote zakujisaidia. Kumbe kweli mganga hajigangi. Nilimhurumia mama na kumchukia babangu. Kwa mara ya kwanza nikatamani kuwa muuguzi, nimpe mama usaidizi na huduma ya kwanza.





Baba naye, mwanasheria muungwana alikuwa amevunja sheria kwa kuendeleza taasubi za kiume nyumbani na kumpiga mama. Ni kweli kwamba mvunja nchi ni mwananchi. Nikaapa kutoshiriki katika ndoa iwapo hayo ndio mazao ya mapenzi na ndoa. Tena nikatamani kuwa hakimu ili nimpe baba hukumu ya kumfa maishani na kumfunza adabu. Nikashindwa la kufanya na nikajilaza sakafuni huku macho yamevimba na kichwa kuniwanga kutokana na kulia kwa muda mrefu.

Akanifikia mama na kuushika mkono wangu wa kulia na kuninyanyua.

“Amka twende zetu. Mahala hapa si salama kwako mwanangu.” Alisema mama huku akinifuta machozi. Akaonyesha bayana kuwa uchungu wa mwana aujuao ni mama. Kusikia hayo, baba pia aliinuka na kunifikia. Akaushika mkono wangu wa kulia.



“Popote huendi mwanangu kwani nyumbani ni nyumbani hata kama hapakaliki.” Alisema na kunipa busu hata penzi la baba kwa mwana likadhihirika waziwazi.

Wote hawa niliwapenda sana. Ningemfuata nani? Mtihani wangu ningeufanyia wapi na tamaduni zilizopitwa na wakati madhara yake gani? Maswali yalinihujumu mno. Wote walikuwa wakinivuta upande wao. Walikumbuka usemi wa wahenga kuwa kila mwamba ngoma huvutia kwake. Nilimtazama mama. Nikamwangalia baba. ‘Fanya uamuzi wa haraka.’ Nilijiambia kwani sasa familia yetu ilikuwa inatengana milele

Read More

USISAHAU ULIPOTOKA

 

SIMULIZI FUPI : USISAHAU ULIPOTOKA



Binti mmoja ambaye alitokea katika familia masikini alifanikiwa kusoma kwa shida mpaka kufanikiwa kuwa mwanasheria. Alipata kazi nzuri, akiishi katika nyumba nzuri ya kifahari.



Pamoja na maisha mazuri lakini binti aliwasahau kijijini kwao, alikua akituma pesa kidogo lakini hakutaka kwenda. Alitaka kuyasahau maisha yake yote ya mateso ya kijijini.



Hata kwa marafiki zake alijitambulisha kama kazaliwa Dar huku akidanganya kuwa wazazi wake wamefariki nayeye alikua ndiyo mtoto pekee, hii ni kwasababu marafiki zake wote walikua wakitoka katika familia za kitajiri.



Baada ya kukaa muda mrefu bila kufika kijijini kwao wazazi wake walipata wasiwasi, huku wakiwa na wasiwasi kuwa kuna kitu kimempata, walichangisha nauli na Mama yake ambaye alikua mzee sana alipanda gari na kwenda kumuona mjini.



Alipelekwa na jirani yao mmoja ambaye alikua akifahamu alipokua akiishi yule binti. Mama alifika na kukuta binti akiwa na afya nzuri, hana tatizo lolote. Binti alikasirika sana kumuona Mama yake kwani alikuja bila taarifa.



Hakumsalimia vizuri na kila saa alikua akimlaumu kwanini hakupiga simu kwanza na kama ni hela si angesema amtumie. Mama huku akitokwa na machozi ya furaha alisema shida yake haikuwa hela bali kumuona mtoto wake baada ya muda mrefu.



Binti alimdanganya Mama yake kua ile nyumba ni nyumba ya kampuni hivyo haruhusiwi kuishi na mtu yoyote kutokana na kazi aliokuwa anaifanya hivyo yeye asingeweza kuishi pale.



Mama hakuwa na maneno, alimuambia hamna shida yeye kwakua ashamuona mwanae roho yake imetulia kwani hakuenda kukaa pale alienda tu kumuona.



Binti alimuacha Mama yake apumzike siku ile na kesho yake ili siku inayofuata apande gari kurudi kijijini. Siku iliyofuata baada ya kutoka kazini rafiki zake walikuja, kulikua na sehemu ambayo walishapanga kwenda.



Walimkuta Mama yake akiwa nnje akipunga upepo. Walimsalimia vizuri na binti alipowaona aliwakimbilia kuwawahi ili Mama sijitambulishe, alifika na kuwaharakisha rafiki zake ili waondoke.



Walipotaka kujua ni nani, alijikuta anadanganya “ Huyo Mama amepotea njia, alipita hapa alikua anamtafuta mtoto wake akakosea nyumba, sasa ndiyo namsaidia, aligonga kwangu kuomba simu, kwani alikua na namba ya mwanae kwenye kikaratasi.



Nimeshampigia mwane atakuja kumchukua. Binti alionge akiamini kuwa kesho yake anamuondoa Mama yake mule ndani hivyo rafiki zake hawatamuona tena.



Wakati akiongea yale maneno hakujua kuwa Mama yake anasikiliza, alistuka baadaye alipogeuka wakati anafungua mlango wa gari ili aingie. Mama yke alikua anatokwa na machozi, binti alijikaza kama vile hakumuona akaingia kwenye gari na kuondoka.



*****

Baada ya mizinguko yake binti alirudi nyumbani, hakumkuta Mama yake, alimuuliza mfanyakazi wa ndani akasema hajui, alijua wameondoka wote kwani alimuacha nnje wakati yeye anatoka na gari.



Binti alianza kupaniki, alisubiria mpaka usiku wa mamnane lakini Mama yake hakurejea. Hapo alianza kuchanganyikiwa, kichwa kikikumbuka maisha ya shida waliyopitia, namna ambavyo Mama yake alivyoteseka kwaajili yake.



Machozi yalinza kumtoka akijutia mambo aliyomfanyia Mama yake. Alimtafuta yule Kaka ambaye alimleta Mama yake pale lakini hakuwa akijua chochote. Usiku ulipita akiwa macho, asubuhi alilazimika kwenda kazini kwani alikua na kikao.



Lakini mchana alishindwa kuvumilia, ilibidi kwenda Polisi na kuanza kumtafuta Mama yake lakini hakupatikana. Siku moja ilipita na hatimaye yapili ilipita bila kumuona Mama yake, alianza kuwa na wasiwasi.



Akiwa ofisini hajui hili wala lile rafiki yake mmoja alikuja, walianza kuongea akiwa hana raha kabisa. Rafiki yake alimuuliza tatizo lilikua nini akaamua kumuambia, lakini kabla hajaanza kuonge arafiki yake alisema.



“Halafu shogaa nilitaka kusahau, unamkumbuka yule Bibi ambaye tulimkuta kwao jana?”

“Ndiyo namkumbuka! Amefanya nini? Umemuona wapi?” Alijikuta anadakia kwa haraka kutaka kujua.

“Basi jana wakati natoka kazini nikapita sehemu, nimekuta watu wamezunguka, kumbe kagongwa na bondaboda kaumia kichwani, watu wakawa wanakimbia kukwepa ushahidi.



Namimi nikapita, sasa baadaye narudi kumbe watu walimuacha pale Bibi wawatu mpaka Polisi wanakuja lisaa lizima baadaye basi Bibi wawatu kashafariki. Kusema kweli roho iliniuma sana kwa kumpita bila kumsaidia…”



Rafiki yake aliongea kwa masikitiko, lakini kabla hajamalizia yule binti alidondoka na kupoteza fahamu. Alizinduka yuko hospitali kazungukwa na marafiki zake na mchumba wake.



Walimuuliza sababu ndipo alipoamua kuwaelezea, kila mtu alimshangaa kwa kumficha Mama yake, walihangaika kumtafuta wakakuta maiti yake, wakamsaidia kusafirisha maiti mpaka Kijijini.



Walizika salama lakini baada ya kurudi mchumba wake alimuacha, marafiki zake wote aliokuwa akiwaona wa maana walimtenga kutokana na tabia zake. Binti alishikwa na msongo wa mawazo.



Kila siku ilikua kulia tu, alishindwa kufanya kazi vizuri, sasa hivi amefukuzwa kazi. Kahama nyumba ya kifahari aliyokua akiishi na sasa yuko mtaani akitafuta ajira huku akiona hata aibu kurudi nyumbani kuwaona ndugu zake.



***MWISHO*** KAMA kisa hiki kimekugusa na unampenda sana Mama yako, unakumbuka uliko toka hembu SHARE na marafiki.

Read More

UNGEFANYA NINI?

 

UNGEFANYA NINI?

Mwanamke alimkimbia mumewe na akamuachia mtoto mwenye miaka mitatu.

Sababu kubwa ya kumkimbia mumewe ni kwamba alipata boyfriend mwenye hela ambaye alikuwa akiishi Michigan huko Marekani.

Huyo Boyfriend au mchepuko wake walijuana kupitia mitandao ya kijamii. Walizoeana sana na mwisho yule boyfriend wake akamuahidi kumtafutia viza ya kuishi Marekani.

Na kweli baada ya miezi kadhaa yule mwanamke alimtoroka mumewe na kutokomea Marekani, huku akiacha taarifa kwamba asitafutwe tena, anaenda kuanza maisha mengine mapya. (mumewe alifirisiwa kutokana na kutuhumiwa ubadhirifu wa mali za kampuni alikokuwa akifanya kazi).

Kutokana na msongo wa mawazo na upweke kwa kipindi kirefu tokea mkewe amtoroke, yule mwanaume akaamua kuoa mke mwingine.

Kwa bahati mbaya yule mwanamke mwingine aliyeolewa hakuweza kushika mimba. Hata hivyo yule mwanamke mwingine alimtunza vema mtoto wake wa kambo kama mwanae vile.

Miaka michache baadae, yule mume alifariki kwa ajali ya gari alilokuwa akisafiri nalo kwenda kijijini kufanya biashara ya mazao.

Mke wake wa pili alifanya kila jitihada kwa uwezo wale wote kumsomesha yule mtoto, na Mungu hakunyimi vyote kwani yule mtoto alikuwa na uwezo mkubwa wa kiakili.

Mwanamke aliuza nyanya sokoni, alitembeza ndizi, alichoma mahindi barabarani na kadharika ilimradi aweze kujitunza yeye na yule mtoto wake wa kufikia.

Yule mtoto alijua kwamba yule ndiye mama yake halisi na ndiye aliyekuwa akimuita mama.

Mama yake halisi aliyetorokea Michigani, Marekani, hakuwahi hata siku moja kutuma salamu au kuwasiliana na mtoto wake, ingawa alipata habari kwamba mumewe wa zamani alifariki kwa ajali.

Miaka mingi ilisonga na kijana alikuwa kwa akili na kimo, alikuwa Chuo kikuu akisomea Uhandisi wa mafuta na gesi (Bachelor of science in petroleum Engineering).

Mama yake halisi aliyeko Marekani hakuweza kupata mtoto tena na yule mwanaume mwingine aliyemuoa, na kwa hilo yule mume wake mpya aliamua kumtimulia mbali.

Kwa kutambua kuwa alifanya kosa kumkimbia mwanae, aliamua kurudi nyumbani kumtafuta mwanae na kumkabidhi utajiri alioupata akiwa Marekani (gawiwo la nusu kwa nusu la mali baada ya kutalikiana na mumewe wa Marekani)

Bahati mbaya alifika na kumkuta mwane akipigania kati ya uhai na kifo kutokana na kufeli kwa figo zake. Madaktari walikuwa wakihitaji pesa nyingi kwa ajili ya upasuaji, pesa ambazo mama yake wa kambo alishindwa kabisa kuzipata.

Mama yake halisi kutoka Marekani aliingilia hilo suala na kulipa pesa zote za hospitali kwa ajili ya matibabu, pia akatoa figo yake moja na maisha ya kijana yakawa yameokolewa.

Baada ya matokeo ya mwisho ya chuo kikuu kutoka, kijana alipata ufaulu wa hali ya juu (first class degree) na akapewa ufadhili wa kwenda kusomea shahada ya uzamili (master's degree) na baada ya hapo udaktari wa falsafa (phd) huko Burnley, Uingereza.

Katika kupokea cheti chake siku ya mahafali chuoni kwao, makamu mkuu wa chuo alimpa kipaza sauti kijana na kumwambia amuite mama yake katika stage na kupokea cheti cha heshima.

Baada ya makamu mkuu wa chuo kusema hayo, mama yake halisi aliyemkimbia alisimama na kujiweka sawa kusubiri kuitwa na mwanae, wakati mama yake wa kambo aliyemlea tokea mdogo akiwa bado amekaa huku machozi mengi yakimtoka huku akimuangalia mwanae wa kufikia kule mbele.

Jibu naliacha hewani.........................

Fikiria wewe ndio huyo mtoto, utamuita nani aje kule stejini kupokea hicho cheti?

A) Mama wa kambo

B) Mama mzazi

Nahitaji majibu yenu, kama huna share kwa wengine waje na majibu.

Read More